Намирници кои можат да ви помогнат да се разладите во топлите денови

Во борбата против топлината, исхраната може да игра голема улога. Треба да се избегнува „тешка“, мрсна и претерано зачинета храна, но затоа има намирници кои треба да се консумираат што почесто и во поголеми количини.

Овие денови дневните температури надминуваат 30 Целзиусови степени. Сладоледите и замрзнатите десерти можат да делуваат како одлично освежување, но ефективни се само во моментот – веќе по 15 или 20 минути ефектот е сосема спротивен. Кои намирници се препорачуваат во лето, бидејќи имаат одлично освежувачко дејство?

Краставица

Краставицата е богата со вода, благодарение на која има моментално хидратантно дејство на телото и способност за намалување на телесната температура. Без разлика дали ќе ја исечете во салата, ќе ја изедете на парчиња или ќе ја додадете во вода (исечена на прстени) – краставицата е многу пожелна во исхраната во лето.

Диња

Дињите се богати со вода, но и со голем број на хранливи материи кои му се потребни на организмот за да функционира правилно: витамин Б, магнезиум, калциум, влакна се само некои од нив. Можете да ја исецкате и да ја послужите разладена или да ја додадете во освежително смути.

Зелен лиснат зеленчук

Зелениот лиснат зеленчук е богат со влакна и калциум, што е многу ефикасно за намалување на телесната температура. Затоа, во текот на летото, пожелно е исхраната да ја засновате на спанаќ, зелена салата, зелка и слични намирници кои би ги јаделе како комплетен оброк или би ги додале во исхраната.

Манго

Мангото многумина го нарекуваат крал на овошјето, бидејќи не само што е вкусно и освежително, туку е добро за варење и дава прилив на позитивна енергија. Може да се јаде на сите можни начини: во коктел, исечен на коцки, како состојка во смути, па дури и блендирано и замрзнато (како сладолед).

Лимон

Оние кои не сакаат обична вода бидејќи е без вкус, лимонот може да биде од голема корист, бидејќи само неколку капки сок од лимон или малку рендана кора и даваат на водата сосема поинаква арома. Покрај тоа, лимонот е богат со витамин Ц, кој е секогаш добредојден за организмот.

Јогурт или грчки јогурт

Богати со калциум, витамин Б и корисни бактерии, јогуртот и грчкиот јогурт се одличен избор во топлите летни денови. Можете да го користите како состојка за подготовка на прелив за салата, да го пиете со додаток на сечкано овошје или да го користите како основа за природен сладолед.

Нане

Нането е познато како намирница која делува освежувачки, поради што е честа состојка во летните коктели. Наједноставниот начин да го имплементирате во вашата летна диета е со додавање во вода (може да додадете и неколку кришки лимон и неколку парчиња краставица), а доколку го консумирате постојано, телото ќе ви се заблагодари со тоа што помалку ќе се потите.